Fransiya Alisher Usmonovdan YI sanksiyalarini olib tashlashni so‘ramoqda
=“Euronews” nashrining manbalariga tayanib xabar berishicha, Bratislava avvalroq Usmonov hamda Mixail Fridmanni Rossiyaga qarshi joriy etilgan cheklovlar ro‘yxatidan chiqarishni talab qilib kelgan edi. Endilikda ushbu pozitsiyani Parij ham qo‘llab-quvvatlayotgani YIga a’zo boshqa davlatlar diplomatlari o‘rtasida e’tirozlarga sabab bo‘ldi. Ba’zi manbalar Fransiyaning ushbu qadami ortida iqtisodiy manfaatlar yotgan bo‘lishi mumkinligini taxmin qilmoqda.
Slovakiya sanksiyalar muddatini uzaytirish bo‘yicha qarorlarga qarshilik bildirib, ma’lum shaxslardan cheklovlarni olib tashlash shartini qo‘ymoqda. Yevropa Ittifoqida sanksiyalar paketini uzaytirish uchun barcha 27 ta a’zo davlatning bir ovozdan roziligi talab etilgani sababli, bitta mamlakatning veto qo‘yishi umumiy kelishuvni to‘xtatib qo‘yishi mumkin. Shu sababli Parijning ushbu harakati Bratislava bilan siyosiy murosaga erishish vositasi sifatida ham baholanmoqda.
Ma’lumot uchun, Alisher Usmonov 2022-yil fevral oyida YI sanksiyalar ro‘yxatiga kiritilgan edi. Ilgari Vengriya ham uni sanksiyalardan chiqarish taklifini ilgari surgandi. So‘nggi paytlarda milliarderga nisbatan Germaniyadagi ba’zi huquqiy tergovlar to‘xtatilgani hamda sudda unga qarshi ayrim da’volar asossiz deb topilgani qayd etilgan. YI elchilarining sanksiyalar bo‘yicha yakuniy to‘xtamga kelish majlisi yaqin kunlarda bo‘lib o‘tishi kutilmoqda.
