Farg‘onada ko‘p qavatli uy yerto‘lasida akula boqilayotgani aniqlandi
Farg‘ona shahridagi ko‘p qavatli uylarning birida yerto‘laga sun’iy hovuz o‘rnatilib, unda baliqlar, jumladan, akula boqilayotgani aniqlandi. Bu haqda hududiy Qurilish va uy-joy kommunal xo‘jaligi sohasida nazorat qilish inspeksiyasi xabar berdi.
Farg‘ona viloyati hududiy Qurilish va uy-joy kommunal xo‘jaligi sohasida nazorat qilish inspeksiyasi Farg‘ona shahrining Muruvvat mahallasi, Farg‘ona ko‘chasi, 78-uyda monitoring o‘tkazdi.
O‘rganish davomida 17-xonadonegasi ko‘p kvartirali uyning yerto‘la qismiga qonunchilik talablariga zid ravishda sun’iy hovuz o‘rnatgani aniqlandi. Hovuzda turli baliqlar, jumladan, akula ham boqilgan.
Mazkur holat yuzasidan xonadon egasiga Ma’muriy javobgarlik to‘g‘risidagi kodeksning 159¹-moddasi asosida ma’muriy jarima qo‘llanildi. Shuningdek, yerto‘lani 15 kun ichida bo‘shatib, asl holatiga keltirish bo‘yicha yozma ko‘rsatma berildi.
Monitoring davomida ichimlik suvidan o‘zboshimchalik bilan foydalanish holati ham aniqlanib, bu bo‘yicha tegishli bayonnoma rasmiylashtirildi.
Inspeksiya ko‘p kvartirali uylarning umumiy foydalanish hududlari, jumladan, yerto‘lalardan qonunchilik talablariga zid ravishda foydalanish taqiqlanganini eslatdi.
