Ekologik filtr o‘rnatmagan issiqxonalar Toshkent mintaqasida faoliyatini davom ettira olmaydi
Toshkent atrofida ko‘mir yoqilishi oqibatida havo sifatining yomonlashishi va fuqarolarning ko‘plab e’tirozlari ortidan ushbu qat’iy talablar ishlab chiqildi.
Yangi tartibga ko‘ra, issiqxonalarni tabiiy va suyultirilgan gaz, elektr, quyosh va geotermal energiya manbalariga o‘tkazish ko‘zda tutilgan. Ko‘mirdan foydalaniladigan holatlarda esa zamonaviy sertifikatlangan qozonlar, majburiy filtrlash uskunasi hamda Milliy ekologik monitoring markaziga ulangan videokuzatuv tizimi o‘rnatilishi shart qilib belgilanmoqda.
Yaqinda issiqxona xo‘jaliklari tomonidan taqdim etilgan Xitoy texnologiyasi asosidagi tajriba filtr uskunasi sinovdan o‘tkazilganda, atmosferaga chiqarilayotgan moddalar xavfsizlik me’yorlariga mos kelmasligi aniqlandi. Shu sababli tadbirkorlar ushbu filtr namunasini takomillashtirgach, mutasaddilar tomonidan qayta o‘lchovlar o‘tkazilishi belgilandi.
Ayni paytda “yashil issiqxonalar”ga o‘tayotgan xo‘jaliklarni qo‘llab-quvvatlash uchun subsidiya va soliq imtiyozlari paketi tayyorlanmoqda. Shunga qaramay, ekologik talablarga javob bermaydigan va havoni ifloslantiruvchi filtrsiz issiqxonalar faoliyatiga qo‘yilgan taqiq saqlanib qoladi.
