Diplomatiyadan kinematografiyagacha: O‘zbekiston va Belarus aloqalari haqida nimalarni bilish kerak?
O‘zbekiston Prezidenti Shavkat Mirziyoyevning Belarusga rasmiy tashrifi davom etmoqda. Ikki mamlakat o‘rtasidagi aloqalarni tartibga soluvchi asosiy hujjat – Davlatlararo munosabatlar asoslari to‘g‘risidagi shartnoma hisoblanadi.
O‘zbekiston va Belarus o‘rtasida diplomatik munosabatlar 1993-yil 21-janvarda o‘rnatilgan. Belarusning Toshkentdagi elchixonasi 1994-yil fevraldan buyon, O‘zbekistonning Minskdagi elchixonasi esa 2017-yil oktyabrdan buyon faoliyat ko‘rsatmoqda. 2024-yilda Toshkent va Minsk shaharlari o‘rtasida rasman birodarlik aloqalari o‘rnatildi.
Bugungi kunda O‘zbekistonda taxminan 18-20 ming nafar belarus millatiga mansub fuqarolar istiqomat qiladi.
Ikki xalqning urush yillaridagi matonati bugungi kunda ham qadrlanadi. Belarusdagi qishloqlardan biri urush davrida ko‘rsatgan jasorati uchun o‘zbek qahramoni Mamadali Topvoldiyev sharafiga Topvaldiyevka deb nomlangan.
Shuningdek, o‘zbek va belarus kinematograflari hamkorligida ushbu o‘zbek qahramonining hayotiga bag‘ishlangan “Kazbek” badiiy filmi suratga olingan.
Belarus xalq shoiri Yakub Kolas o‘z vaqtida O‘zbekistonga bag‘ishlab shunday yozgan edi:
"Boshim uzra o‘zga osmon,
Chodir yozar keng, bearmon,
Bahor yashnab kelgan zamon,
Ko‘z oldimda sen namoyon, O‘zbekiston!”
Ushbu tarixiy xizmatlari va hurmat ramzi sifatida Toshkent shahrida Yakub Kolasga haykal (byust) o‘rnatilgan.
Iqtisodiy yo‘nalishda esa Belarusning eng yirik yuk avtomobillari ishlab chiqaruvchi mashhur BelAZ korxonasi texnikalari O‘zbekiston tog‘-kon sanoatida faol qo‘llanib kelmoqda.
