Davlat xizmatchilari uchun yagona ish haqi tizimi joriy etilishi rejalashtirilmoqda
Davlat xizmatchilari uchun yagona ish haqi tizimi joriy etiladi. Bu haqda prezident Shavkat Mirziyoyev davlat fuqarolik xizmatchilarining oylik ish haqi tizimi va mehnatga haq to‘lash shartlarini muvofiqlashtirish bo‘yicha takliflar taqdimotida aytildi.
Qayd etildiki, bugungi kunda davlat xizmatchilari ish haqi tarkibida lavozim maoshining ulushi 15 foizdan oshmaydi. Ish haqi fondining 70 foizgacha qismini esa xodimning aniq mehnat natijasiga bog‘lanmagan turli ustama, mukofot va rag‘batlantiruvchi to‘lovlar tashkil etadi.
Shu bois davlat fuqarolik xizmatchilari mehnatiga haq to‘lashning yagona, shaffof va natijaga asoslangan tizimini joriy etish taklif qilindi. Yangi tizim bilan 54 ming nafar davlat xizmatchisini qamrab olish rejalashtirilgan.
Taklifga ko‘ra, davlat organlari milliy, respublika, hududiy hamda tuman va shahar darajalariga ajratiladi. Xodimlar esa bajaradigan vazifalariga qarab ma’muriy boshqaruv, asosiy va qo‘llab-quvvatlash guruhlariga bo‘linadi.
Shuningdek, xalqaro tajriba asosida 11 ta razryad va 6 ta pog‘onadan iborat yangi ish haqi setkasi joriy etilishi taklif qilinmoqda. O‘ndan ortiq ustama va mukofotlar o‘rniga uchta asosiy rag‘batlantirish to‘lovi amal qiladi.
Jumladan, xodimlarga malaka darajasi, funksional vazifalarni bajarishi, ijro va mehnat intizomi, tashabbuskorligi hamda samaradorlik ko‘rsatkichlari (KPI) asosida ustama to‘lanadi.
Muhim va murakkab vazifalarni bajargan, innovatsion yondashuvlarni joriy etgan hamda yuqori natija ko‘rsatgan xodimlar hisobot davri yakunlari bo‘yicha bonus olishi mumkin.
Takliflarga ko‘ra, hududiy boshqarmalar xodimlarining ish haqi tegishli hokimliklardagi o‘xshash lavozimlar maoshidan yuqori bo‘lmaydi. Tuman va shaharlarda ish haqi hamda shtat birliklari hudud aholisi soni va o‘ziga xos xususiyatlaridan kelib chiqib belgilanadi.
Prezident mehnatga haq to‘lash tizimida adolat va shaffoflikni ta’minlash, ish haqini xodimning malakasi, mas’uliyati hamda erishgan natijalari bilan bog‘lash muhimligini ta’kidladi. Shuningdek, bonus to‘lovlari sun’iy intellekt va boshqa ilg‘or axborot texnologiyalarini o‘zlashtirish, zamonaviy bilim va ko‘nikmalarni egallash hamda malaka oshirish kabi aniq mezonlar asosida belgilanishi qayd etildi.
