Buyuk Britaniyada Eron hakerlari elektr stansiyasi faoliyatini to‘xtatib qo‘ydi
The Telegraph nashri xabar beradiki, bu Eron hakerlarining Buyuk Britaniyadagi energetika infratuzilmasi obyektini to‘liq to‘xtatib qo‘yishga erishgan ilk holatidir. Hukumat xavfsizlik va maxfiylik nuqtai nazaridan hujumga uchragan obyektning aniq nomini oshkor qilmagan bo‘lsa-da, stansiya xodimlari tizimni qayta tiklash uchun to‘rt kun davomida ish olib borgani ma’lum qilingan.
Hujum nishoni bo‘lgan elektr stansiyasi nisbatan kichik quvvatga ega bo‘lgani sababli, sodir bo‘lgan nosozlik mamlakatning umumiy elektr ta’minoti tizimiga yoki energiya ishlab chiqarish hajmiga salbiy ta’sir ko‘rsatmagan. Ekspertlarning fikricha, kiberhujumdan ko‘zlangan asosiy maqsad tinch aholiga zarar yetkazish emas, balki Eron rejimiga aloqador kiberguruhlarning G‘arbning muhim strategik obyektlariga kirib borish imkoniyatlarini namoyish etish bo‘lgan.
Mazkur voqeadan so‘ng Britaniya rasmiylari energetika kompaniyalari mutasaddilari uchun brifing o‘tkazib, Milliy kiberxavfsizlik markazi (NCSC) bilan hamkorlikda obyektlarni himoya qilish bo‘yicha yangi tavsiyalarni tarqatdi. Bu hodisa AQSHning 12 shtatidagi suv inshootlariga hamda bir qator Yevropa davlatlariga uyushtirilgan shunga o‘xshash kiberhujumlar to‘lqini bilan bir vaqtda sodir bo‘lgani aytilmoqda.
