Buxoro tadbirkorlari Belarusda ishlab chiqarish korxonalari ochishni ko‘rib chiqmoqda
Buxoro viloyati ishbilarmon doiralari vakillari Belarusda ishlab chiqarish korxonalarini tashkil etishga qiziqish bildirdi. Bu haqda “Белта” Belarus Milliy eksportni qo‘llab-quvvatlash markazi matbuot xizmatiga tayanib ma’lum qildi.
Markaz direktori Nikolay Borisevich Belarus Respublikasidagi O‘zbekiston Respublikasining Favqulodda va Muxtor Elchisi Nuriddin Mamajonov bilan uchrashuv o‘tkazdi. Tadbirda, shuningdek, Buxoro viloyati hokimi o‘rinbosari Rizo Asadov hamda viloyat ishbilarmon doiralari vakillari ishtirok etdi.
Muzokaralarning asosiy mavzusi savdo-iqtisodiy hamkorlikni kengaytirish va ikki mamlakat korxonalari o‘rtasida to‘g‘ridan to‘g‘ri aloqalarni rivojlantirish bo‘ldi. O‘zbekiston elchisi diplomatik vakolatxonaning ustuvor yo‘nalishlaridan biri ikki tomonlama savdo hajmini yanada oshirish ekanini ta’kidladi. Nikolay Borisevich Milliy eksportni qo‘llab-quvvatlash markazining xorijiy hamkorlar va belaruslik eksportchilarni qo‘llab-quvvatlash imkoniyatlari haqida ma’lumot berdi. Xususan, markaz Belarus hududlariga biznes tashriflarini tashkil etishda ko‘maklashishga, mamlakatda biznes yuritish shartlari bo‘yicha dolzarb ma’lumotlarni taqdim etishga, shuningdek, hamkorlarni topish va qo‘shma loyihalarni amalga oshirishda yordam berishga tayyorligini bildirdi.
Uchrashuvda qishloq xo‘jaligi va chorvachilik sohalaridagi hamkorlik istiqbollariga alohida e’tibor qaratildi. Markaz direktori o‘zbekistonlik tadbirkorlarga Belarus korxonalari, jumladan, logistika sohasi vakillari bilan aloqalarni yo‘lga qo‘yish hamda samarali kooperatsiya zanjirlarini shakllantirishda ko‘mak berishga tayyorligini tasdiqladi. Buxoro viloyati ishbilarmon doiralari vakillari, shuningdek, Belarusda ishlab chiqarish korxonalarini tashkil etib, keyinchalik ushbu mahsulotlarni uchinchi davlatlar bozorlariga eksport qilish istiqboliga ham qiziqish bildirdi.
