“Bunyodkor” futbol klubiga 5 milliard so‘m ajratildi: Jamoa nega inqirozga uchragan edi?
Toshkentning “Bunyodkor” jamoasi og‘ir iqtisodiy inqiroz sabab Superliganing 15-turida Navoiyga yo‘l ololmadi. Yo‘l va mehmonxona xarajatlariga mablag‘ topilmagani bois O‘zPFL “Qizilqum”ga qarshi uchrashuvda poytaxtliklarga texnik mag‘lubiyat yozdi va takroriy holatda jamoa musobaqadan chiqarilishi haqida ogohlantirildi.
Klubdagi inqiroz bosh homiy “O‘zbekneftgaz” AJ 2026-yildan moliyalashtirishni to‘xtatgani va braziliyalik afsona Rivaldo oldidagi qarzdorlik to‘lovi kechikkani ortidan chigal tus olgan edi. Oqibatda FIFA transfer taqiqini tiklab, avvalgi chegirmali kelishuvlarni bekor qildi. Maoshsiz qolgan futbolchilar va jamoat faollarining xavotirlaridan so‘ng tarmoqlarda “Bunyodkor”ni qo‘llab-quvvatlash to‘lqini boshlandi.
Aholining e’tibori va klub murojaatidan so‘ng, 1-avgust kuni davlat rahbari qaroriga asosan jamoaga 5 milliard so‘m yo‘naltirildi. Bu mablag‘ klubni chetlashtirish xavfidan saqlab qoldi va o‘yinlarga tayyorgarlikni qayta tiklash imkonini berdi.
Ma’lumot uchun, mamlakatda 2030-yilgacha professional futbolni bosqichma-bosqich xususiylashtirish va davlat budjetidan uzish jarayoni ketmoqda. Rejaga ko‘ra, jamoalar bozor mexanizmlariga o‘tkazilib, xususiy investorlarga topshirilishi belgilangan.
