Ayubxon Yunusov O‘zbekistonning Suriyadagi elchisi etib tayinlandi
O‘zbekistonning Suriyadagi elchisi etib Ayubxon Yunusov tayinlandi (qarorgohi Al-Kuvayt). Unga mamlakat tashqi ishlar vaziri Asad Hasan ash-Shayboniyga ishonch yorliqlari nusxalarini topshirdi. Bu haqda “Dunyo” axborot agentligi xabar berid.
Uchrashuvda O‘zbekiston va Suriya o‘rtasidagi siyosiy muloqotni mustahkamlash, savdo-iqtisodiy hamkorlikni kengaytirish hamda o‘zaro tashriflarni faollashtirish masalalari muhokama qilindi.
Tomonlar savdo-iqtisodiy hamkorlik bo‘yicha hukumatlararo qo‘mita tuzish, ikki mamlakat tashqi ishlar vazirliklari o‘rtasida siyosiy maslahatlashuvlar mexanizmini yo‘lga qo‘yish va boshqa qo‘shma tadbirlarni amalga oshirish yuzasidan fikr almashdi.
Asad Hasan ash-Shayboniy Suriya O‘zbekiston bilan o‘zaro manfaatli barcha yo‘nalishlarda hamkorlikni izchil rivojlantirishdan manfaatdor ekanini bildirdi. Shuningdek, O‘zbekiston ilgari surayotgan taklif va tashabbuslarni ko‘rib chiqishga tayyorligini ma’lum qildi.
Uchrashuv yakunida tomonlar siyosiy muloqot, yuqori darajadagi tashriflar va savdo-iqtisodiy aloqalarni yanada rivojlantirishga tayyor ekanini ta’kidladi.
Ma’lumot o‘rnida, Ayubxon Yunusov 2024-yil 6-fevralda O‘zbekistonning Kuvaytdagi elchisi etib tayinlangan. U 2025-yilning 10-oktabridan buyon O‘zbekistonning Iroqdagi elchisi lavozimida ham ishlab kelmoqda.
