AQShning Oregon shtati va SeaTac shahri ham 1-sentyabrni “O‘zbekiston Mustaqilligi kuni” deb e’lon qildi
AQShning Oregon shtati hamda Vashington shtatidagi SeaTac shahri 2026-yil 1-sentabrni “O‘zbekiston Mustaqilligi kuni” deb e’lon qildi. Bu haqda tegishli rasmiy deklaratsiyalar qabul qilindi.
Oregon gubernatori Tina Kotek imzolagan hujjatda 1-sentabr O‘zbekiston Respublikasi mustaqilligining 35 yilligi ekani qayd etilgan. Unda O‘zbekistonning iqtisodiy va ijtimoiy islohotlari, xalqaro aloqalari kengayib borayotgani hamda Markaziy Osiyoda mintaqaviy hamkorlikni mustahkamlashdagi o‘rni ta’kidlangan.
Shuningdek, AQSh va O‘zbekiston o‘rtasidagi savdo, investitsiyalar, texnologiyalar, ta’lim, yashil energetika va turizm sohalaridagi hamkorlik rivojlanib borayotgani qayd etilgan. Oregon shtati O‘zbekiston bilan madaniy, iqtisodiy, ta’lim va xalqlar o‘rtasidagi aloqalarni yanada kengaytirishni qo‘llab-quvvatlashi bildirilgan.
Shu munosabat bilan Oregon gubernatori Tina Kotek 2026-yil 1-sentabrni shtatda “O‘zbekiston Mustaqilligi kuni” deb e’lon qilgan. Deklaratsiyani Oregon davlat kotibi Tobias Rid ham imzolagan.
Bundan tashqari, Vashington shtatidagi SeaTac shahri meri Mohamed Egal ham 1-sentabrni “O‘zbekiston Mustaqilligi kuni” deb e’lon qildi.
SeaTac deklaratsiyasida O‘zbekistonning boy tarixi va madaniy merosi, shuningdek, mamlakatda ilg‘or ishlab chiqarish, aerokosmik sanoat va zamonaviy texnologiyalarga yo‘naltirilayotgan investitsiyalar alohida qayd etilgan.
Hujjatda SeaTac shahrida G‘arbiy AQSh–O‘zbekiston savdo missiyasi vakolatxonasini tashkil etish rejalari ham tilga olingan. Bu tashabbus O‘zbekiston va AQSh o‘rtasidagi do‘stlik hamda iqtisodiy aloqalar rivojlanib borayotganining ifodasi sifatida baholangan.
SeaTac meri shahar aholisini O‘zbekistonning boy tarixi, madaniyati va ikki xalq o‘rtasidagi do‘stlikni e’tirof etishga chaqirgan.
