AQShdan O‘zbekistondagi Humo va Uzcard kartalariga to‘g‘ridan-to‘g‘ri pul yuborish imkoniyati yaratildi
AQSHda yashayotgan o‘zbekistonliklar endilikda O‘zbekistondagi Humo va Uzcard kartalariga to‘g‘ridan-to‘g‘ri pul o‘tkazishi mumkin. Yangi raqamli servis uPay.net fintech platformasi orqali ishga tushirildi. Bu haqda “Dunyo” axborot agentligi xabar berdi.
Servis Nyu-Yorkda yashayotgan asli o‘zbekistonlik tadbirkorlar Xusrav Mahmudov va Akmal Abdullayev tomonidan yaratilgan uPay.net platformasi asosida joriy etilgan.
Avval platforma orqali AQSHdan O‘zbekistondagi mobil aloqa, internet, kommunal va boshqa kundalik xizmatlar uchun masofadan to‘lovlarni amalga oshirish imkoniyati mavjud edi.
Endilikda esa foydalanuvchilar AQSHdan turib O‘zbekistondagi Humo va Uzcard kartalariga bevosita pul o‘tkazmalarini yuborishi mumkin.
Kompaniya ma’lumotiga ko‘ra, xizmatni ishlab chiqishda AQSH va O‘zbekistonning moliyaviy tartibga solish talablariga rioya qilish, tranzaksiyalar xavfsizligini ta’minlash hamda foydalanuvchilar uchun qulay sharoit yaratishga e’tibor qaratilgan.
Loyihani amalga oshirish jarayonida O‘zbekistonning Nyu-Yorkdagi Bosh konsulxonasi va vatandoshlar tashkilotlari bilan ham muloqot olib borilgan.
Kelgusida pul o‘tkazmalari geografiyasini kengaytirish, yangi moliyaviy vositalarni joriy etish hamda xorijda yashovchi o‘zbekistonliklar uchun xizmatlarni rivojlantirish rejalashtirilgan.
