AQSH Suriyani terrorizm homiylari ro‘yxatidan chiqardi
AQSH Moliya vazirligi Suriyaning terrorizmni qo‘llab-quvvatlovchi davlatlar ro‘yxatidagi maqomini bekor qilganini va tegishli qaror darhol kuchga kirganini ma’lum qildi. Prezident Donald Tramp tashabbusi bilan amalga oshirilgan ushbu qadam Kongressdagi 45 kunlik tekshiruvdan so‘ng o‘z tasdig‘ini topgan. Davlat kotibi Marko Rubioning ta’kidlashicha, Vashingtonning bunday qarorga kelishiga Ahmad ash-Sharaa boshchiligidagi yangi hukumatning xalqaro terrorchilik guruhlaridan to‘liq uzilish borasida olgan qat’iy majburiyatlari va ijobiy islohotlari sabab bo‘lgan.
So‘nggi sanksiya cheklovlarining olib tashlanishi deyarli 14 yillik urush oqibatlarini bartaraf etishga urinayotgan Damashq uchun hayotiy ahamiyatga ega. Suriya Tashqi ishlar vazirligi ushbu qaror mamlakatga xorijiy sarmoyalarni jalb qilish, xalqaro bank-moliya tizimi bilan aloqalarni qayta tiklash hamda biznes muhitini jonlantirishdagi barcha to‘siqlarga barham berganini bildirgan.
Reuters ma’lumotlariga ko‘ra, Vashington bilan muloqotlar doirasida yangi hukumat Rossiya nefti importini keskin kamaytirishga ham rozi bo‘lgan.
Ushbu qaror bilan birga “Nusra fronti” tashkiloti ham xalqaro terrorchi tuzilmalar ro‘yxatidan chiqarildi. Ayni paytda AQSHning terrorizm homiylari ro‘yxatida faqat uchta davlat – Kuba, Eron va Shimoliy Koreya qolmoqda. Vashington Asad rejimining sobiq mulozimlari, inson huquqlarini buzganlar va ISHID kabi guruhlarga nisbatan individual sanksiyalarni saqlab qolgan holda, mamlakatni qayta qurishda yangi hukumat bilan hamkorlikni kengaytirmoqda.
