AQSh g‘arbiy sohilida O‘zbekistonning yangi Bosh konsulxonasi ochildi
O‘zbekiston Prezidentining tegishli farmoni asosida tashkil etilgan ushbu Bosh konsullik Sietl markazidagi “1000 2nd Avenue” manzilida joylashgan. Yangi diplomatik muassasaning konsullik okrugi Vashington, Oregon, Aydaho hamda Montana shtatlarini qamrab oladi. Ushbu kundan e’tiroban ushbu hududda yashayotgan hamyurtlarimiz uchun pasport va vizalarni rasmiylashtirish, konsullik ro‘yxatiga turish hamda boshqa barcha turdagi huquqiy-ma’muriy xizmatlar ko‘rsatiladi.
Ushbu vakolatxonaning ochilishi O‘zbekistonning AQSh g‘arbiy sohilidagi diplomatik ishtirokini sezilarli darajada kengaytiradi. Shu vaqtga qadar O‘zbekistonning AQShdagi asosiy diplomatiya nuqtalari faqat Vashingtondagi elchixona va Nyu-Yorkdagi Bosh konsulxonadan iborat edi. Sietldagi konsullik, shuningdek, ikki mamlakat o‘rtasidagi savdo-investitsiyaviy aloqalarni rivojlantirish va mintaqadagi yirik o‘zbek diasporasi bilan yaqindan hamkorlik qilish vazifasini ham bajaradi.
Ma’lumot o‘rnida, Sietl va Toshkent shaharlari o‘rtasidagi do‘stona va diplomatik aloqalar uzoq tarixga ega bo‘lib, ular 1973-yildayoq birodar shaharlar maqomini olgan. Prezident topshirig‘iga ko‘ra, kelgusida AQShning boshqa yirik iqtisodiy markazlari – Filadelfiya, Chikago va Orlando shaharlarida ham O‘zbekiston diplomatik vakolatxonalarini ochish rejalashtirilmoqda.
Avvalroq AQShning eng boy shaharlaridan biri bo‘lgan Sielt ma'muriyati 1-sentyabrni “O‘zbekiston kuni” deb e’lon qilgan edi.
