Afg‘oniston tomoni O‘zbekiston haqida tarqalgan xabarlarni rasman rad etdi
O‘zbekistonning Qobuldagi elchixonasi ayrim OAVda Afg‘oniston rasmiysining O‘zbekistonga aytgan tanqidiy fikrlari yuzasidan o‘rganish o‘tkazdi va afg‘on tomonining rasmiy raddiyasini qabul qilib oldi. Bu haqda elchixona xabar bermoqda.
O‘zbekiston Respublikasining Afg‘onistondagi elchixonasi ma’lum qiladiki, joriy yilning 16-iyul kuni elchixona nomiga Afg‘oniston muvaqqat hukumatining Fazilatlarni targ‘ib qilish va yomonliklarning oldini olish vazirligidan rasmiy raddiya murojaati kelib tushgan. Unda ayrim doiralar va ommaviy axborot vositalari ikki qo‘shni davlat o‘rtasidagi ishonch va yaxshi qo‘shnichilik munosabatlariga putur yetkazish maqsadida faktlarni buzib talqin qilayotgani ta’kidlangan.
Vazirlik o‘z murojaatida O‘zbekistonni Imom Buxoriy kabi buyuk islom ulamolarining muqaddas vatani deb atab, ikki davlat o‘rtasidagi chuqur diniy, tarixiy va madaniy mushtaraklikni alohida qadrlashini bildirgan.
“Birodar O‘zbekiston bo‘yicha pozisiyamiz aniq. Ushbu yurt islom ummatining ko‘plab buyuk ulamolari, jumladan Imom Buxoriyning muqaddas Vatanidir. Afg‘oniston va O‘zbekiston o‘rtasida chuqur diniy, tarixiy, madaniy va xalqlar mushtarakligi mavjud. Biz ushbu munosabatlar va o‘xshashliklarni alohida qadrlaymiz”, deyiladi vazirlik bayonotida.
Afg‘oniston tomoni ijtimoiy tarmoqlar va OAVda O‘zbekiston haqida salbiy ohangda tarqalgan chiqishlarni mutlaqo haqiqatga to‘g‘ri kelmasligini ma’lum qilib, bunday da’volarni qat’iyan rad etgan hamda ikki davlat o‘rtasidagi o‘zaro hurmatga asoslangan aloqalar bundan keyin ham mustahkamlanishiga ishonch bildirgan.
Avvalroq O‘zbekiston Tashqi ishlar vazirligi matbuot kotibi Omonulla Fayziyev ham “Tolibon” vazirining O‘zbekistonda Islomning faqat nomi qolganini iddao qilgani haqidagi xabarlarni “dizinformatsiya” deb atagan edi.
