2029-yilda iste’foga chiqmoqchi bo‘lgan To‘qayevning prezidentlik muddati nollashtirildi
Qozog‘iston Prezidenti Qosim-Jomart To‘qayevning vakolat muddati yangi Konstitutsiya kuchga kirishi munosabati bilan nollashtirildi. Bu haqda 7-iyul kuni mamlakat Konstitutsiyaviy sudi xabar berdi.
Qozog‘istonda joriy yilning 1-iyulidan yangi Konstitutsiya kuchga kirdi. Eski tahrirdagi qonunchilikka muvofiq, 2019-yildan buyon mamlakatni boshqarib kelayotgan To‘qayevning vakolati 2029-yilgacha bo‘lgan bitta muddat bilan cheklangan edi.
Yangi Konstitutsiya prezidentlar uchun bir martalik yetti yillik muddat cheklovini saqlab qolgan bo‘lsa-da, sud qarori amaldagi davlat rahbarining avvalgi prezidentlik davrlari ushbu cheklovda hisobga olinmasligini anglatadi.
Konstitutsiyaviy sud normativ qarorida tushintirishicha, 1995-yilgi Konstitutsiya bo‘yicha lavozimni egallab turgan shaxslarning 2026-yilgi Konstitutsiya kuchga kirganidan keyin saylanishi yoki tayinlanishi birinchi marta saylanish deb hisoblanadi.
Ma’lumot o‘rnida, Qosim-Jomart To‘qayev muqaddam konstitutsiyaviy o‘zgarishlarga sodiq qolishini va yetti yildan ortiq prezident lavozimida qolmasligini ta’kidlagan edi. Xususan, u 2025-yil “Al Jazeera” telekanaliga bergan intervyusida 2029-yilda iste’foga chiqishini e’lon qilgan hamda Qozog‘istonda prezidentlik muddati bor-yo‘g‘i yetti yil bilan cheklanganini qayd etgan edi.
