Ş , Ç , Ö , Ğ — Senat 28 ta harfdan iborat yangi o‘zbek alifbosini ma’qulladi
Oliy Majlis Senati 19-yalpi majlisida lotin yozuviga asoslangan o‘zbek alifbosini 28 ta harf va 1 ta tutuq belgisidan iborat shaklda belgilashni nazarda tutuvchi qonunni ma’qulladi va ko‘rib chiqish uchun prezidentga yubordi. Bu haqda Senat matbuot xizmati xabar berdi.
Qonun Senatning 19-yalpi majlisida muhokama qilingan. Unga ko‘ra, amaldagi 26 ta harf va 3 ta harflar birikmasidan iborat alifbo o‘rniga 28 ta harf va 1 ta tutuq belgisidan tashkil topgan yangi alifbo joriy etilishi ko‘zda tutilmoqda.
Shuningdek, yangi alifboga o‘tish jarayonida fuqarolar va tashkilotlarning huquq va manfaatlarini hisobga olish bo‘yicha alohida tartiblar belgilanmoqda. Qonun kuchga kirguniga qadar amaldagi alifboda rasmiylashtirilgan hujjatlar, milliy valyuta va qimmatli qog‘ozlarning muomalada bo‘lishiga to‘sqinlik qilinmaydi.
Davlat organlari va tashkilotlarining ayrim ramziy belgilari, peshlavha va ko‘rsatkichlaridan esa ular yaroqsiz holga kelguniga qadar yoki belgilangan muddatgacha foydalanishga ruxsat beriladi.
Senatorlar mazkur o‘zgarishlar o‘zbek alifbosi va imlo qoidalarini takomillashtirish, davlat tilidan foydalanish imkoniyatlarini kengaytirish hamda o‘zbek tilini raqamlashtirish jarayonlarini rivojlantirishga xizmat qilishini qayd etdi.
Muhokama yakunida qonun senatorlar tomonidan ma’qullandi.
