“O‘zbekfilm” auksion va bankrotlik yoqasida. Studiyaning yer-mulklari 23 mln yevro kredit uchun garovga qo‘yilgan
Madaniyat vazirining birinchi o‘rinbosari – Kinematografiya agentligi direktori Jahongir Ahmedov ma’lum qiladiki, studiyaning barcha mol-mulklari hamda yer maydonlari ko‘rsatilgan yirik kredit uchun bankka garovga qo‘yilgan. Buning ustiga, jamlanib qolgan soliq qarzdorliklari tufayli kinostudiya balansidagi 12 ta avtomashina yaqin kunlarda auksion orqali sotilib ketish xavfi ostida turibdi. Shuningdek, xodimlarning oylik maoshlari bo‘yicha ham jiddiy qarzdorliklar shakllangan.
Kinostudiya mavqeini saqlab qolish uchun muassasa bir yilda kamida 60 milliard so‘mlik buyurtmalarni bajarishi talab etiladi.
“Ya’ni u amalda davlat buyurtmasiga qaram bo‘lib qolgan. Biznes modeli yo‘q. Bozor mexanizmiga to‘liq o‘tilmagan”, deya ta’kidladi Jahongir Ahmedov.
Agentlik rahbari ushbu moliyaviy raqamlar ortida bir asrlik o‘zbek kinosining tarixi, obro‘si va kelajak taqdiri turganini alohida uqtirdi. Hozirgi asosiy vazifa studiyani shunchaki saqlab qolish emas, balki uni barqaror biznes modeliga ega bo‘lgan, xususiy investitsiyalar hamda xalqaro hamkorlikni jalb qila oladigan zamonaviy milliylashtirilgan kompaniyaga aylantirishdan iborat.
“O‘zbekfilm – oddiy kinostudiya emas. U – o‘zbek kinosi tarixi. Va endi u o‘zbek kinosi kelajagining ham tayanchi bo‘lishi kerak”, dedi Ahmedov.
Ma’lumot uchun, Kinematografiya agentligiga 2019-2024 yillarda Firdavs Abduxoliqov, 2024-2026 yillarda Shuxrattulla Rizayev rahbarlik qilgan.
