Zaxarova O‘zbekiston ichki ishlariga yana “burun tiqmoqda”. Rossiya vakili toshkentlik bloger Makarenkoga chora ko‘rishni talab qildi
Rossiya TIV rasmiy vakili Mariya Zaxarova qilgan bayonotida bloger Nikita Makarenkoni “rusofobik uydirmalar” tarqatishda hamda millatlararo nizoni keltirib chiqarishda ayblagan.
“Ko‘rinib turibdiki, bu kabi “befarq bo‘lmagan fuqarolar”ning haqiqiy maqsadi — o‘zlarining xorijdagi homiylari ko‘rsatmasi bilan Rossiya-O‘zbekiston strategik sherikligiga soyalash tushirish, axborot makoniga zararli kun tartibini singdirish hamda jamiyatdagi millatlararo hamjihatlikka zarar yetkazishdir”, degan Zaxarova jurnalistlarga javob berar ekan.
Rossiya tarafining da’vo qilishicha, aynan Makarenko 4 yilu 2 oyga ozodlikdan mahrum etilgan bloger Aziz Hakimovga nisbatan jinoiy ish qo‘zg‘atilishiga asosiy sababchi bo‘lgan. Shayxontohur tuman sudi Hakimovni tuhmat, haqorat va milliy aodavat qo‘zg‘atishda aybdor deb topgan edi.
Mojaro ildizi o‘tgan yilning avgust oyiga borib taqaladi. O‘shanda Makarenko jamoatchilik va huquqni muhofaza qiluvchi idoralarni Hakimovning mamlakat mustaqilligini pastga urish, sobiq ittifoqni ulug‘lash hamda urushni targ‘ib qilishga qaratilgan harakatlariga chora ko‘rishga chaqirgan edi. Yopiq tartibda o‘tgan sud majlisida Makarenko jabrlanuvchi tomondan qatnashgan va sud yakunida Hakimovning Telegram-kanali ham bloklangan.
E’tiborlisi, Moskva bunga qadar Hakimov ishiga nisbatan birmuncha ehtiyotkor munosabat bildirib, O‘zbekistonning ichki ishlariga aralashmasligini ta’kidlagan edi. Biroq sud hukmi e’lon qilingach, Rossiya TIV pozitsiyasi keskinlashdi va asosiy e’tiborini Makarenkoga qaratib, rasmiy Toshkentdan uning xatti-harakatlariga nisbatan huquqiy choralar ko‘rishni kutayotganini ma’lum qildi.
