Yunusobodda 2,75 gektarli yangi dam olish maskani barpo etilmoqda
Maydoni 2,75 gektarni egallaydigan ushbu yangi maskanda mavjud barcha yashil hududlar to‘liq saqlab qolinadi. Kompleks obodonlashtirish rejasiga ko‘ra, hududga olti turdagi 1 800 tup manzarali daraxt hamda 3 000 tup buta ekilishi ko‘zda tutilgan. Ko‘chatlar va ko‘kalamzorlashtirilgan maydonlarni muntazam va samarli parvarishlash uchun zamonaviy tomchilatib sug‘orish tizimi joriy etiladi.
Hududda aholining mazmunli hordiq chiqarishi uchun barcha sharoitlar yaratilmoqda. Xususan, gulzorlar, ravon piyodalar yo‘lagi hamda shinam dam olish zonalari barpo etiladi. Yangi maskan to‘liq zamonaviy yoritish chiroqlari, qulay o‘rindiqlar va chiqindi qutilari bilan ta’minlanishi belgilangan.
Ushbu jamoat parki to‘liqlikcha mahalliy aholining talab hamda ehtiyojlaridan kelib chiqib loyihalashtirilgan. Qurilish va ko‘kalamzorlashtirish ishlari yakunlangach, ushbu maydon yunusobodliklar uchun eng salqin va ekologik toza dam olish maskanlaridan biriga aylanadi.
