Xivada Ichan-qal’adagi sayyohlar yuklamasini kamaytiradigan yangi turistik shaharcha quriladi
Xivada 12,3 gektarlik xalqaro turistik shaharcha barpo etiladi. Prezident Shavkat Mirziyoyev xalqaro turistik shaharcha loyihasi taqdimoti bilan tanishdi.
Bu yerda mehmonxonalar, muzey, milliy va xalqaro taomlar restoranlari, savdo va xizmat ko‘rsatish obyektlari tashkil etiladi.
Loyiha konsepsiyasida Xorazmning qadimiy shaharsozlik an’analari, jumladan, 1511-yilda Xiva xonligining ilk poytaxti bo‘lgan Vazir shahrining tarixiy tuzilishi va ko‘chalar tarmog‘idan foydalaniladi.
Hududda yashil maydonlar, sayr yo‘laklari, sharsharali favvoralar va ichki ariqlar barpo etiladi. Avtoturargohlarda quyosh panelli soyabonlar o‘rnatilishi ham rejalashtirilgan.
Yangi turistik shaharcha Ichan-qal’adagi turistik yuklamani kamaytirish, sayyohlar uchun yangi yo‘nalish va xizmatlarni yaratish hamda ularning Xorazmda qolish muddatini uzaytirishga xizmat qiladi. Loyiha doirasida minglab yangi ish o‘rinlari yaratilishi kutilmoqda.
Ma’lumot uchun, so‘nggi to‘qqiz yilda Xorazmda 280 ta mehmonxona va mehmon uyi qurilgan, mehmonxona fondi 4 barobar oshgan. So‘nggi besh yilda viloyatga kelayotgan xorijiy sayyohlar soni esa 10 barobarga ko‘paygan.
