Xitoy-Qirg‘iziston-O‘zbekiston temiryo‘li yuk yetkazib berish vaqtini 8 sutkagacha qisqartiradi
Pekinda o‘tkazilgan Barqaror transport bo‘yicha global forumda transport vaziri Ilhom Mahkamov mintaqadagi yirik strategik magistral loyihalari hamda xalqaro yuk tashishni raqamlashtirish bo‘yicha amalga oshirilayotgan ishlar yuzasidan axborot berdi.
Umumiy uzunligi 532,5 kilometrni tashkil etuvchi Xitoy-Qirg‘iziston-O‘zbekiston temiryo‘li Qoshg‘ar – Torug‘art – Makmal – Jalolobod – Andijon yo‘nalishi bo‘ylab o‘tadi. 2024-yil dekabrida rasman boshlangan qurilish doirasida 20 ta stansiya, 42 ta ko‘prik hamda umumiy masofasi 103 kilometrdan oshadigan 27 ta tunnel barpo etilishi ko‘zda tutilgan. Dastlabki hisob-kitoblarga ko‘ra, yangi koridor orqali Sharqiy Osiyodan Yaqin Sharq hamda Janubiy Yevropaga yuk tashish masofasi 900 kilometrga qisqarib, yillik yuk oqimi 15 million tonnagacha yetishi kutilmoqda.
Shu bilan birga, Markaziy Osiyoni Afg‘oniston orqali Pokiston va Arab dengizi portlari bilan bog‘laydigan Transafg‘on temir yo‘li loyihasini amaliyotga tatbiq etish yuzasidan ham ishlar davom etmoqda. Termiz – Naybobod – Maydonshahr – Logar – Xarlachi yo‘nalishi bo‘ylab uch tomonlama kelishuv asosida loyiha-smeta hujjatlarini tayyorlash bosqichi kechmoqda. Dengiz portlariga chiqish imkoniyati cheklangan sharoitda ushbu quruqlik koridorlari tranzit salohiyatini keskin oshirishga xizmat qiladi.
Bundan tashqari, xalqaro avtomobil tashuvlarini raqamlashtirish doirasida e-Permit elektron ruxsatnoma tizimi sakkizta davlat, jumladan Xitoy bilan muvaffaqiyatli yo‘lga qo‘yilgan. Ozarbayjon bilan esa eTIR elektron tizimini amaliyotga joriy etish ishlari olib borilmoqda. Forum yakunida ishtirokchi mamlakatlar va xalqaro tashkilotlar tomonidan barqaror transport sohasida global hamkorlik dasturi qabul qilindi.
