Xalqaro olimpiada g‘olibi bo‘lgan o‘quvchi yotoqxonaning 4-qavatidan tushib ketib, vafot etdi
Maktab-internatning iqtidorli o‘quvchilaridan biri Sh.J. bundan o‘n kun muqaddam o‘quv muassasasi yotoqxonasining 4-qavatidan tushib ketgan. Olgan og‘ir tan jarohatlari sababli u zudlik bilan shifoxonaga yotqizilgan va shifokorlar nazoratida davolangan. Biroq ko‘rsatilgan tibbiy yordamga qaramay, o‘quvchi 15-sentyabr kuni shifoxonada dunyodan ko‘z yumdi.
Vafot etgan o‘quvchi Sh.J. aniq fanlar yo‘nalishida yuqori natijalarni ko‘rsatib kelayotgan iqtidorli yoshlardan biri bo‘lgan. U matematika va ilmiy izlanishlar bo‘yicha ko‘plab respublika hamda xalqaro tanlovlarda g‘oliblikni qo‘lga kiritgan.
Xususan, 2026-yilda Olmaota shahrida bo‘lib o‘tgan yosh tadqiqotchilar xalqaro turnirida uning jamoasi birinchi o‘rinni egallab, oltin medalga sazovor bo‘lgan, shuningdek, u Sa’di Sirojiddinov nomidagi respublika matematika turnirida ham sovrindorlar qatoridan joy olgan.
Bosh prokuratura matbuot kotibi Hayot Shamsutdinov Portal24.uz’ga ma’lum qiladiki, mazkur holat bo‘yicha Olmazor tumani prokuraturasi tomonidan tergovga qadar tekshiruv harakatlari olib borilmoqda.
