Wildberries sotuvchilari zarba yetgan ombordagi tovarlar uchun berilayotgan arzimagan kompensatsiyadan norozi
“Agentstvo” va “Novaya-Yevropa” e’tiborini qaratgan sotuvchilarning tahliliga ko‘ra, Elektrostaldagi Wildberries omboriga qilingan hujumdan jabrlangan tadbirkorlarning ko‘pchiligi haligacha kompensatsiya ololmagan. Miyonasi millionlab rubllik mahsulotidan ayrilgan sotuvchilar to‘lovlar kechikayotganidan shikoyat qilmoqda.
Arzimagan tovon puli olgan sotuvchilar esa to‘langan mablag‘ haqiqiy zararga umuman mos kelmasligini ta’kidlamoqda. Xususan, 40 ming rubllik tovari yonib ketgan tadbirkorga bor-yo‘g‘i 2 600 rubl, 130 ming rubllik mahsuloti bor boshqa sotuvchiga esa atigi 2 900 rubl o‘tkazib berilgan.
Kompaniya rahbari Tatyana Kimning ta’kidlashicha, birinchi navbatda 88 mingdan ortiq eng kichik biznes vakillariga pul ajratilmoqda. Kompensatsiya tovarlar go‘yo omborda odatdagidek sotilayotgan tezlik va narxlarda bosqichma-bosqich hisoblab berilishi rejalashtirilgan.
Bundan tashqari, ushbu ombordagi dron hujumi oqibatida halok bo‘lgan 25 yoshli Tojikiston fuqarosi Navro‘zjon Sodiqovning oilasiga 1 million rubl o‘tkazilgan. Vaholanki, avvalroq Wildberries rahbariyati qurbonlarning yaqinlariga 2 million rubldan tovon puli berishni va’da qilgan edi.
