Wildberries omborlariga dron hujumlari o‘zbekistonlik sotuvchilarga ham zarar yetkazayotgani aytilmoqda
Kompaniya rahbariyati ta’kidlaydiki, Wildberries obyektlariga qilinayotgan doimiy hujumlar nafaqat rossiyaliklarga, balki O‘zbekiston, Qirg‘iziston, Belarus, Qozog‘iston, Armaniston va Xitoydan bo‘lgan o‘n minglab tadbirkorlarga milliardlab zarar yetkazmoqda. Oxirgi vaqtlarda kompaniyaning Moskva viloyati, Leningrad, Tambov, Volgograd, Krasnodar va boshqa hududlardagi logistika obyektlari zarbalarga uchragan.
Ayniqsa, 25-iyul kuni Yekaterinburgdagi omborga qilingan hujum borasida kompaniya va rasmiylar ma’lumotida katta tafovut paydo bo‘ldi.
Kompaniya bayonotida omborga 200 dan ortiq samolyot turidagi dron uchib kelgan va to‘xtash joyidagi mashinalar yonib ketgan. Rahbariyat bunday hujumlarni “yengib bo‘lmas kuch” (fors-major) deb atab, sotuvchilar zararlarini to‘liq qoplash majburiyati yo‘qligini bildirdi (shunga qaramay, qo‘llab-quvvatlovchi to‘lovlar amalga oshirilmoqda).
Rasmiylar va Mudofaa vazirligi, Sverdlovsk viloyati gubernatori va vakolatli vakil faqat bitta dron urib tushirilgani va uning parchalari tushib 300 kv.m maydonda yong‘in chiqqanini ma'lum qilgan. Rossiya Mudofaa vazirligi esa ushbu kechadagi hisobotlarida Sverdlovsk viloyatini umuman tilga olmagan.
Solishtirish uchun, agar kompaniya keltirgan raqam to‘g‘ri bo‘lsa, o‘sha kuni butun Rossiya bo‘ylab uchirilgan barcha dronlarning deyarli yarmi aynan ushbu omborga yo‘naltirilgan bo‘lib chiqadi. Hozircha ushbu 200 ta dron haqidagi ma’lumot qayerdan olinganiga rasman aniqlik kiritilmagan.
Ma’lumot uchun, Wildberries – Rossiya va MDH mamlakatlaridagi eng yirik onlayn marketpleys platformasi. U mustaqil sotuvchilar, ishlab chiqaruvchilar va xaridorlarni bog‘laydigan tarmoq bo‘lib, Rossiyadan tashqari O‘zbekiston, Qozog‘iston, Belarus, Qirg‘iziston va Armaniston kabi mamlakatlarda ham keng logistika va topshirish punktlari tarmog‘iga ega.
