Urganch–Xiva ilk pulli avtoyo‘li qiymati 30 million dollarga qimmatlashgani tasdiqlandi
Yangi pulli yo‘l loyihasining qimmatlashgani 25-avgust kuni Shavkat Mirziyoyev ishtirokida o‘tkazilgan yangi obyektlarni ishga tushirish marosimida ma’lum bo‘ldi. Tadbirda Xorazm viloyati hokimining birinchi o‘rinbosari Anvar Davletov obyektning umumiy qiymati 150 million dollar ekkanini ta’kidlab o‘tgan. Keyinchalik Avtomobil yo‘llari qo‘mitasi ham ushbu ma’lumotni tasdiqlab, loyihaning boshlang‘ich bahosi 120 million dollar bo‘lganini qayd etdi.
Loyiha bo‘yicha xorijiy hamkor hali ham ochiqlanmagan, shuningdek, smeta nega aynan 30 million dollarga oshganiga ham aniq tushuntirish berilmagan. Qurilish jarayonida amalda bitta yerosti tunneli, 8 ta yo‘l o‘tkazgich, 15 ta ko‘prik va 106 ta suv o‘tkazish inshooti barpo etilgan (dastlabki rejada ko‘priklar soni 17 tani, maxsus o‘tish joylari 7 tani tashkil qilishi kerak edi).
Avgust oyidan ishga tushgan 35 kilometrlik ushbu to‘rt polosali pulli yo‘l ikki shahar o‘rtasidagi manzilni 15-20 daqiqaga qisqartiradi. To‘lov tizimi elektron shaklda ishlaydi va yengil avtomobillar uchun butun trassa bo‘ylab 25 ming so‘m, qisqartirilgan 28 kilometrlik qism uchun esa 20 ming so‘m etib belgilangan. Yo‘lning o‘tkazish quvvati sutkasiga taxminan 20 mingta avtomobilni tashkil etadi.
