Turkiyada 1,5 yil yashiringan o‘zbekistonlik ushlanib, Toshkentga olib kelindi
O‘zbekiston Jinoyat kodeksining 168-moddasi (firibgarlik) bo‘yicha xalqaro qidiruvda bo‘lgan A.A. ismli fuqaro Turkiyada aniqlandi. U bir yarim yil davomida huquqni muhofaza qiluvchi organlardan yashirinib kelgan.
Ikki mamlakat idoralari o‘rtasidagi hamkorlik natijasida qo‘lga olingan ushbu shaxs O‘zbekistonga qaytarilib, tergov hamda sud jarayonlarini o‘tkazish uchun vakolatli organlarga topshirildi.
Ta’kidlanishicha, O‘zbekiston va Turkiya o‘rtasida jinoyatchilikka qarshi kurashish hamda qidiruvdagi shaxslarning javobgarlikdan qochishiga yo‘l qo‘ymaslik bo‘yicha tezkor amaliy hamkorlik davom etmoqda.
