Toshkentda voyaga yetmagan haydovchilar ishtirokidagi dahshatli YTH tafsilotlari ochiqlandi
Hodisa shu yilning 30-iyun kuni erta tongda yuz bergan. Ijtimoiy tarmoqlarda tarqalgan videolarda KIA K5 va yana bir avtomobil yuqori tezlikda harakatlanayotgani aks etgan. Chorrahada KIA katta tezlikda Lacetti avtomobili bilan to‘qnashgan. Kuchli zarba oqibatida Lacetti deyarli ikki bo‘lakka ajralib ketgan.
Dastlabki ma'lumotlarga ko‘ra, Lacetti chorrahada burilayotgan vaqtda KIA unga kelib urilgan. Aniqlanishicha, KIA rulida otasining mashina kalitini ruxsatsiz olib, do‘stlari bilan shahar aylanishga chiqqan voyaga yetmagan yigit bo‘lgan.
Voyaga yetmagan haydovchi aytdiki, u yuqori tezlikda harakatlangan va chorrahaga chiqqan Lacettini ko‘rib avtomobilni o‘z vaqtida to‘xtata olmagan. To‘qnashuv oqibatida Lacetti'da bo‘lgan ikki kishi voqea joyida halok bo‘lgan. Yana uch kishi, jumladan ikki nafar bola og‘ir tan jarohatlari olib, shifoxonaga yotqizilgan.
Voyaga yetmagan haydovchining otasi halok bo‘lganlarning oila a'zolariga hamdardlik bildirib, qonun doirasida javobgarlikni o‘z zimmasiga olishga tayyor ekanini ma'lum qilgan.
Mazkur holat yuzasidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish, odamlar o‘limiga sabab bo‘lish) bilan jinoyat ishi qo‘zg‘atilgan. Hozirda tergov harakatlari olib borilmoqda.
