Toshkentda uch bolasi bilan ko‘chada qolgan ayol topildi
Ijtimoiy tarmoqlarda uch nafar kichik yoshli farzandi bilan ko‘chada yordamga muhtoj holda o‘tirgan ayol aks etgan video tarqalib, keng muhokamalarga sabab bo‘lgan. Ushbu holat ortidan Sergeli tumani hokimligi va ichki ishlar boshqarmasi xodimlari hamkorlikda tezkor surishtiruv ishlarini olib borib, 3-sentyabrga o‘tar kechasi oilani Sergeli-7 mavzesidan topishdi va ularning shaxsiga aniqlik kiritishdi.
Olib borilgan o‘rganishlar natijasida ushbu ayol Toshkent viloyatining Ohangaron tumanidagi “Birlik” mahallasida doimiy ro‘yxatda turishi va istiqomat qilishi ma’lum bo‘lgan. Hokimlik va ichki ishlar xodimlari tomonidan ayol hamda uning uch bolasi zudlik bilan xavfsiz maskanga olib o‘tilib, ularga issiq ovqat, birinchi gallik oziq-ovqat mahsulotlari hamda kiyim-kechaklar yetkazib berildi, shuningdek, shifokorlar ko‘rigidan o‘tkazilgan.
Hozirgi vaqtda sodir bo‘lgan hodisa va oilaning ahvoli bo‘yicha Ohangaron tumani IIBga rasmiy ma’lumot berilgan bo‘lib, mas’ullar ko‘magida ayol va uning farzandlari doimiy yashash manziliga kuzatib qo‘yilishi rejalashtirilgan. Biroq tuman ma’muriyati o‘z bayonotida uch nafar ma’sum bola bilan ayolning nega ko‘chada tunashga majbur bo‘lgani va ushbu ayanchli holatga olib kelgan sabablarga aniqlik kiritmagan.
