Toshkentda qariyb 20 mlrd so‘mlik budjet mablag‘larini talon-toroj qilish holati aniqlandi
Toshkent shahrida 19,9 mlrd so‘mlik budjet mablag‘larini talon-toroj qilish holati fosh etildi. Bu haqda Bosh prokuratura huzuridagi Iqtisodiy jinoyatlarga qarshi Departament ma’lum qildi.
Qayd etildiki, tergovga qadar tekshiruv davomida “Hududgazta’minot” AJ hamda “Texnopark” MChJning ayrim mas’ul shaxslari o‘zaro til biriktirib, elektron gaz hisoblagichlariga texnik xizmat ko‘rsatish bahonasida 19 mlrd so‘mlik budjet mablag‘larini o‘zlashtirish yoki rastrata qilish yo‘li bilan talon-toroj qilgani aniqlangan.
Shuningdek, “Texnopark” MChJ tomonidan ishlab chiqarilib, “Hududgazta’minot” AJ tomonidan iste’molchilarga o‘rnatilgan 273 dona gaz hisoblagichi ko‘rsatkichlari kam hisoblagani oqibatida davlat va jamiyat manfaatlariga 861,1 mln so‘m miqdorida zarar yetkazilgani ma’lum bo‘ldi.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.
