Toshkentda o‘rtacha oylik 12 mln so‘mdan oshdi, bankirlar esa 19 mln so‘mdan ko‘p olmoqda
Yilning dastlabki 6 oyida maosh miqdori bo‘yicha Toshkent shahri mutlaq yetakchilik qilmoqda – poytaxtda o‘rtacha oylik 12,01 mln so‘mni (o‘sish 18,2 foiz) tashkil etgan. Hududlar orasida ikkinchi yuqori ko‘rsatkich Navoiy viloyatida qayd etildi – 8,72 mln so‘m. Eng kam o‘rtacha ish haqi esa Qashqadaryo (4,86 mln so‘m) va Surxondaryo (4,93 mln so‘m) viloyatlariga to‘g‘ri kelmoqda.
Maoshlarning o‘sish sur’ati bo‘yicha Jizzax viloyati yetakchi bo‘ldi (20,4 foiz o‘sish, 5,39 mln so‘m). Shuningdek, Namangan (5,19 mln), Toshkent (6,67 mln), Samarqand (5,19 mln) va Buxoro (5,61 mln) viloyatlarida ham respublika bo‘yicha o‘rtacha o‘sish ko‘rsatkichlari qayd etilgan. Sirdaryo, Xorazm, Farg‘ona, Andijon hamda Qoraqalpog‘istonda esa o‘sish nisbatan sekinroq kechgan.
Sohalar kesimida eng yuqori maosh bank, sug‘urta va moliya sektorida saqlanib qolmoqda – o‘rtacha 19,1 mln so‘m (17,5 foizga oshgan). Axborot va aloqa sohasida ishlayotganlar o‘rtacha 17,4 mln so‘m, transport va saqlash yo‘nalishidagilar esa 11,07 mln so‘m daromad olmoqda. Shuningdek, sanoatda o‘rtacha oylik 8,26 mln, savdoda 7,65 mln, qurilishda esa 7,02 mln so‘mga teng bo‘ldi.
Eng tez o‘sish transport va saqlash (22,8 foiz), ta’lim (20,3 foiz / 4,97 mln so‘m), tibbiyot (20,1 foiz / 4,44 mln so‘m) va qurilish (19,9 foiz) sohalarida kuzatildi. Eng past o‘sish sur’ati esa yashash va ovqatlanish xizmatlari (11,2 foiz / 5,18 mln so‘m) hamda savdo sohasiga to‘g‘ri kelgan.
