Toshkentda nosozlikni bartaraf etayotgan elektrik narvondan yiqilib vafot etdi
Shayxontohur tumanida 9-iyul kuni elektr ta’minoti korxonasi xodimi ish vaqtida sodir bo‘lgan baxtsiz hodisa oqibatida vafot etdi. Dastlabki ma’lumotlarga ko‘ra, 27 yoshli xodim elektr tarmog‘idagi nosozlikni bartaraf etib, narvondan pastga tushayotgan vaqtida yiqilib ketgan va boshi temir konstruksiyaga urilib, og‘ir jarohat olgan. Shifoxonaga olib borilganiga qaramay, shifokorlar uning hayotini saqlab qola olmagan.
“Hududiy elektr tarmoqlari” AJ matbuot xizmatining ma’lum qilishicha, ayni paytda maxsus buyruq asosida korxona mas’ullari va vakolatli organlar ishtirokida baxtsiz hodisaning kelib chiqish sabablari o‘rganilmoqda.
Bosh prokuratura matbuot kotibining xabar berishicha, voqea joyi tuman prokuraturasi va tezkor-tergov guruhi tomonidan ko‘zdan kechirilgan bo‘lib, hozirda Shayxontohur tumani prokuraturasi tomonidan tergovga qadar tekshiruv harakatlari olib borilmoqda.
