Toshkentda eng arzon va eng qimmat uylar qaysi tumanda? Iyul oyining qaynoq narx statistikasi
Poytaxtda kvartira sotib olishni rejalashtirayotganlar uchun yangi narxlar e’lon qilindi. Toshkentdagi kvartira bozori iyul oyini katta narx sakrashlarisiz boshladi. Ko‘chmas mulkni ommaviy baholash milliy markazi ma’lumotlariga ko‘ra, poytaxtda ko‘p kvartirali uylarning o‘rtacha qiymati deyarli o‘zgarmagan bo‘lsa-da, ayrim tumanlarda narxlar asta-sekin o‘sishda davom etmoqda. Iyul oyida Toshkentdagi ko‘p kvartirali uylarning 1 kvadrat metri o‘rtacha 16,5 mln so‘mni tashkil etgan. Shu bilan birga, tumanlar o‘rtasidagi narxlar farqi ikki baravardan ortiq bo‘lib qolmoqda.
Ko‘p kvartirali uylar segmentida eng qimmat hudud Shayxontohur tumani bo‘lib, 1 kvadrat metrning o‘rtacha narxi iyul boshida 25,3 mln so‘mni tashkil etdi. Undan keyingi o‘rinlarda Mirobod (23,2 mln so‘m) va Yakkasaroy (20,5 mln so‘m) turibdi.
Aksincha, eng arzon xonadonlar Yangihayot tumanida qayd etildi. Bu yerda 1 kvadrat metrning o‘rtacha narxi 11 mln so‘m bo‘lib, Shayxontohurdagi narxdan qariyb 2,3 baravar arzon. Bektemir (11,5 mln so‘m) va Sergeli (11,45 mln so‘m) ham eng arzon hududlar qatoridan joy oldi.
Yakka tartibdagi uy-joylar bozorida esa Mirzo-Ulug‘bek tumani yetakchi bo‘lib qolmoqda. Bu tumanda 1 sotix yerning o‘rtacha narxi 1 mlrd 719,9 mln so‘mga yetgan. Keyingi o‘rinlarni Yakkasaroy (1 mlrd 643,6 mln so‘m) va Yunusobod (1 mlrd 444 mln so‘m) egallagan.
Bu segmentda ham Bektemir (394 mln so‘m) va Yangihayot (404,7 mln so‘m) eng hamyonbop hududlar sifatida qayd etildi. Mirzo-Ulug‘bekdagi yer narxi Bektemirdagiga nisbatan qariyb 4,4 baravar yuqori.
Noturar obyektlar bozorida ham Mirzo-Ulug‘bek tumani yetakchilikni saqlab qoldi. Bu yerda 1 kvadrat metrning o‘rtacha narxi 24,4 mln so‘mni tashkil etdi. Undan keyin Mirobod (23 mln so‘m) va Yakkasaroy (19,8 mln so‘m) joylashgan. Eng arzon noturar obyektlar esa Bektemirda (8,3 mln so‘m) qayd etildi.
Iyul oyida narxlarning o‘sish sur’ati yuqori bo‘lmasa-da, ayrim tumanlarda sezilarli o‘zgarish kuzatildi. Ko‘p kvartirali uylar narxi eng ko‘p Bektemirda (+1,6%), noturar obyektlar narxi esa Sergelida (+2,5%) oshdi. Shu bilan birga, ayrim segmentlarda pasayish ham kuzatildi. Xususan, Sergelida yakka tartibdagi uy-joylar narxi 0,5%, Uchtepa va Yashnobodda noturar obyektlar narxi mos ravishda 0,6% va 0,9% kamaygan.
Umuman olganda, iyul oyi boshidagi ma’lumotlar Toshkent ko‘chmas mulk bozorida keskin sakrash kuzatilmaganini, biroq markaziy tumanlar hanuz eng qimmat, yangi rivojlanayotgan chekka tumanlar esa nisbatan arzon bo‘lib qolayotganini ko‘rsatmoqda.
