Toshkentda BYD haydovchisi trotuarda ketayotgan rossiyalik erkakni urib yubordi. Oqibatida u voqea joyida halok bo‘lgan
2026-yilning 10-iyul kuni Toshkent shahrida BYD haydovchisi trotuarda ketayotgan 27 yoshli rossiyalik fuqaroni urib yubordi. Oqibatda erkak voqea joyida halok bo‘ldi. Bu haqda poytaxt IIBBga tayanib Repost xabar berdi.
Qayd etildiki, hodisa S. Azimov va Istiqlol ko‘chalari kesishmasida sodir bo‘lgan. Avtomobilni 25 yoshli Sh.Sh. boshqargan. Hodisa oqibatida 1998-yilda tug‘ilgan A.L. ismli piyoda voqea joyida halok bo‘lgan. YTH 145-maktab ro‘parasida, “Stellaris” klinikasi yaqinida yuz bergan.
Dastlabki ma’lumotlarga ko‘ra, BYD avtomobili Korzinka supermarketi tomondan harakatlanayotgan bo‘lgan. Haydovchi chapga burilayotgan boshqa avtomobil bilan to‘qnashuvning oldini olishga urinib, boshqaruvni trotuar tomonga burib yuborgan. Oqibatda u trotuarda ketayotgan erkakni urib yuborgan va yo‘l to‘sig‘ini ham buzib ketgan. Guvohlarning aytishicha, BYD yuqori tezlikda harakatlangan bo‘lgan.
Halok bo‘lgan erkakning yaqinlari allaqachon Toshkentga yetib kelgan va zarur hujjatlarni rasmiylashtirish bilan shug‘ullanmoqda. Marhumning do‘stlari esa u kelasi hafta sevgilisini ota-onasi bilan tanishtirishni rejalashtirganini aytgan.
Mazkur YTH yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish oqibatida odam o‘limiga sabab bo‘lish) bilan jinoyat ishi qo‘zg‘atilgan. Hozirda tergov harakatlari davom etmoqda.
