Toshkent xalqaro “Yashil shaharlar” tarmog‘iga kirdi
O‘zbekiston Ekologiya va iqlim o‘zgarishi milliy qo‘mitasi ma’lumotiga ko‘ra, Toshkentning ushbu tarmoqqa qo‘shilganini tasdiqlovchi sertifikat Rimda FAO vakillari tomonidan topshirildi. Mazkur a’zolik shaharga iqlim o‘zgarishiga qarshi kurashish uchun xalqaro yashil moliyalashtirish imkoniyatlarini ochadi va shahar atrofi o‘rmon xo‘jaligi hamda ekologik rejalashtirish bo‘yicha texnik ko‘mak olish imkonini beradi.
Ta’kidlash joizki, tarmoqqa kirish Toshkentning ekologik jihatdan toza shahar deb tan olinganini anglatmaydi. Ayni vaqtda poytaxtda havo sifati juda xavfli darajada qolmoqda – Jahon banki va Ekologiya vazirligi tadqiqotlariga ko‘ra, havodagi zaharli PM2.5 zarrachalari miqdori JSST me’yorlaridan 6 barobardan ko‘proq yuqori. Zaharli chang-g‘uborning 36 foizi tabiiy chang, 28 foizi isitish tizimlari, qolgani esa transport va sanoat chiqindilariga to‘g‘ri kelmoqda.
Shuningdek, shahar ichida ko‘kalamzorlashtirish darajasi ham ancha past bo‘lib, hozirda har bir aholiga atigi 3 kvadrat metr yashil hudud to‘g‘ri keladi. FAO xalqaro tarmog‘iga a’zo bo‘lish orqali Toshkentdagi yashil zonalarni 25 ming gektarga yetkazish hamda har bir fuqaroga to‘g‘ri keladigan daraxtzorlar maydonini 6 kvadrat metrgacha ko‘paytirish rejalashtirilmoqda. Shu tariqa, ushbu loyiha mavjud ekologik muammolarni bartaraf etishda xalqaro tajriba va resurslardan foydalanish uchun asosiy vositaga aylanadi.
