Toshkent viloyatidagi soliqchilar 5,2 mlrd soʻmlik soliqni hisoblamagani aniqlandi
Toshkent viloyati soliq boshqarmasining ayrim masʼul xodimlari olti MCHJda oʻtkazilgan audit tekshiruvlarida 5,2 mlrd soʻmlik soliqlarni hisoblamasdan dalolatnomalarni rasmiylashtirgani aniqlandi. Bu haqda Iqtisodiy jinoyatlarga qarshi Bosh prokuraturasi huzuridagi Iqtisodiy jinoyatlarga qarshi kurashish departamenti xabar berdi.
Aniqlanishicha, olti MCHJning masʼul shaxslari 32,6 mlrd soʻmlik qoʻshilgan qiymat soligʻini budjetdan noqonuniy qaytarib olgan.
Shuningdek, ular 195,9 mlrd soʻmlik mahsulotlarni naqd pulga sotib, savdodan tushgan mablagʻlarni bankka topshirmasdan hamda savdo qoidalarini buzish orqali 42,5 mlrd soʻmlik soliqlarni qasddan toʻlashdan boʻyin tovlaganlikda gumon qilinmoqda.
Tekshiruv davomida Toshkent viloyati soliq boshqarmasining ayrim masʼul xodimlari ushbu MCHJlarda oʻtkazilgan audit tekshiruvlari dalolatnomalarini 5,2 mlrd soʻmlik soliqlarni hisoblamasdan rasmiylashtirgani, buning oqibatida davlat va jamiyat manfaatlariga juda koʻp miqdorda zarar yetkazilgani aniqlangan.
Mazkur holat yuzasidan Jinoyat kodeksining tegishli moddalari bilan jinoyat ishi qoʻzgʻatilib, tergov harakatlari olib borilmoqda.
