Toshkent shahrida avtobus ustiga elektr kabeli uzilib tushdi.
Favqulodda vaziyatlar vazirligi hodisa 11-avgust kuni sodir bo‘lgani haqida xabar berdi. “Toshkent shahar elektr tarmoqlari” MCHJ holat yuzasidan izoh berib, uzilib tushgan elektr tarmog‘i iste’molchi tasarrufida bo‘lganini ma’lum qildi.
Qayd etildiki, Qorasuv-1 hududida iste’molchiga tegishli 0,4 kV kuchlanishli havo elektr uzatish tarmog‘ida qisqa tutashuv yuzaga kelgan. Mazkur past kuchlanishli tarmoq TP-2748-sonli transformator punktiga ulangan bo‘lib, elektr tarmog‘i iste’molchi tasarrufida hisoblanadi.
Hodisa haqida xabar kelib tushishi bilan Mirzo Ulug‘bek tuman elektr ta’minoti korxonasining tezkor guruhi voqea joyiga yetib borgan. Fuqarolar xavfsizligini ta’minlash maqsadida iste’molchi tasarrufidagi tarmoq elektr ta’minotidan uzilgan va uzilib tushgan simlar xavfsiz tarzda olib tashlangan.
“Toshkent shahar elektr tarmoqlari” MCHJ ma’lumotiga ko‘ra, natijada xavfli holat to‘liq bartaraf etilib, hudud xavfsiz holatga keltirilgan.FVV esa avvalgi bayonotida hodisa oqibatida fuqarolar va transport vositalariga zarar yetmaganini ma’lum qilgan edi.
