Toshkent shahar IIBB ijaraga uy qidirayotgan talabalarni ogohlikka chaqirdi
Yangi o‘quv yilining boshlanishiga sanoqli kunlar qolayotgan bir paytda talabalar Toshkentga kelib, ijara xonadon izlashni boshlamoqda. Shu munosabat bilan Toshkent shahar Ichki ishlar bosh boshqarmasi talabalar va ularning ota-onalarini firibgarlardan ehtiyot bo‘lishga chaqirdi.
IIBB ma’lumotiga ko‘ra, firibgarlar internet va ijtimoiy tarmoqlarga o‘zlariga tegishli bo‘lmagan xonadonlarning suratlarini joylashtirib, ularni arzon narxda ijaraga berishni taklif qilmoqda. Fuqarolarni ishontirib, uy-joyni ko‘rsatmasdan turib oldindan pul o‘tkazishni so‘raydi. Pul o‘tkazilgach esa yozishmalarni o‘chirib, aloqani uzib qo‘yadi.
Shu sababli talabalar xonadonni avval ko‘zdan kechirishi, uy egasi bilan shaxsan uchrashib, ijara shartnomasini rasmiylashtirgandan keyingina pul to‘lashlari tavsiya etilgan.
