Toshkent bozorlarini arzon mahsulotlar bilan ta’minlash uchun Afg‘onistondan mahsulot xarid qilinadi
Bosh vazir o‘rinbosari Jamshid Xo‘jayev boshchiligidagi O‘zbekiston delegatsiyasi 25-iyul kuni Afg‘onistonning Bomiyon va Xirot viloyatlarida bo‘lib, savdo-iqtisodiy aloqalarni kengaytirish masalalarini muhokama qildi. Tashrifdan ko‘zlangan asosiy maqsad – Toshkent shahri bozorlarini arzon mahsulotlar bilan ta’minlash, savdo uylari tashkil etish va sanoatning turli tarmoqlarida eksport-import hajmini oshirishdan iborat.
Savdo-sanoat palatasi ma’lumotiga ko‘ra, Afg‘onistonning “kartoshka poytaxti” sanalgan Bomiyon viloyati O‘zbekistonga yiliga 300 ming tonnagacha kartoshka yetkazib berish imkoniyatiga ega. Hozirda ushbu hududda O‘zbekiston bilan hamkorlikda 17 gektar maydonga sanoatbop "Fontane" navli kartoshka urug‘lari ekilib, tajriba loyihasi amalga oshirilmoqda.
Muzokaralar yakunida ikki mamlakat tadbirkorlari o‘rtasida to‘g‘ridan-to‘g‘ri hamkorlikni yo‘lga qo‘yish, qishloq xo‘jaligida qo‘shma loyihalarni yo‘lga qo‘yish hamda afg‘onistonlik dehqonlarni O‘zbekistonda malaka oshirishga jalb etish bo‘yicha kelishuvlarga erishildi. Shuningdek, Bomiyonda meva va mineral o‘g‘itlarni saqlashga mo‘ljallangan zamonaviy logistika ombori barpo etiladi.
