Telegramda Ukraina kanallarini o‘chirishdan bosh tortgan Pavel Durovga Rossiyada terrorizm bo‘yicha ayblov e’lon qilindi
FXX ma’lumotlariga ko‘ra, Telegram rahbariyati messenjerdagi Ukraina maxsus xizmatlari hamda terrorchi tashkilotlar tomonidan foydalanilgan kanal va botlarni o‘chirmagan. Ushbu manbalar Rossiyada qo‘poruvchilik, ommaviy qotilliklar va kiber-firibgarlikni muvofiqlashtirish uchun qo‘llanilgani ta’kidlanmoqda.
Maxsus xizmat bir necha yil ichida messenjer orqali rejalashtirilgan 475 ta terakt hamda maktablardagi 61 ta xurujning oldi olinganini bildirgan. Roskomnadzor tomonidan noqonuniy kontentni o‘chirish bo‘yicha yuborilgan 150 mingdan ortiq talab esa e’tiborsiz qolgan.
Rossiya Jinoyat kodeksining 205.1-moddasi (terrorchilik faoliyatiga ko‘maklashish) bo‘yicha ayblanayotgan Durovga 8 yildan 15 yilgacha yoki umrbod ozodlikdan mahrum etish jazosi tahdid solmoqda.
Pavel Durov ushbu ayblovlarga o‘ziga xos tarzda reaksiya bildirdi. Telegram asoschisi o‘zining ijtimoiy tarmoqdagi sahifasida Rossiya hukumatining ayblovlari va qidiruv qaroriga javoban hech qanday rasmiy matnsiz, faqatgina kinoyali va nopisand jest aks etgan suratini joylashtirish bilan cheklandi.
