Talabalarga har oy 440 ming so‘mgacha ijara puli to‘lab beriladi
Ushbu imtiyozdan davlat oliy ta’lim muassasalarida kunduzgi shaklda, grant yoki kontrakt asosida o‘qiyotgan talabalar foydalana oladi. Kompensatsiya olishning asosiy shartlaridan biri – talaba o‘ziga yoki ota-onasiga tegishli bo‘lmagan xonadonda yashashi hamda ijara shartnomasi soliq organlarida rasmiy ro‘yxatdan o‘tkazilgan bo‘lishidir. Agar bir uyda bir nechta talaba birga yashasa, shartnomada ismi ko‘rsatilgan bo‘lishi sharti bilan ularning har biriga alohida pul ajratiladi.
Arizalar har oyning 1-sanasidan 7-sanasigacha masofaviy va bepul ravishda qabul qilinadi. Hujjatlarni topshirish uchun Yagona interaktiv davlat xizmatlari portali (my.gov.uz), Oliy ta’lim vazirligining elektron platformasi yoki bevosita Davlat xizmatlari markazlariga murojaat qilish yetarli.
Yuborilgan arizalar OTM huzuridagi maxsus komissiya tomonidan ko‘rib chiqiladi. Ijara kompensatsiyasi ma’qullangan taqdirda, belgilangan mablag‘ har oyning 15-sanasiga qadar to‘g‘ridan-to‘g‘ri talabaning bank plastik kartasiga o‘tkazib beriladi.
