Tailand O‘zbekiston fuqarolari uchun 60 kunlik vizasiz rejimni rasman bekor qildi
15-sentyabrdan e’tiboran O‘zbekiston fuqarolari uchun Tailandga amal qilib kelgan 60 kunlik vizasiz kirish tartibi bekor qilinadi. Tailand Tashqi ishlar vazirligi tomonidan e’lon qilingan yangilangan ro‘yxatga O‘zbekiston kiritilmadi va endilikda mamlakat fuqarolari ushbu davlatga borishdan oldin oldindan viza rasmiylashtirishlari shart bo‘ladi.
Yangi kiritilgan tartibga ko‘ra, shu paytgacha 60 kunlik vizasiz tizimdan foydalanib kelgan 93 ta davlat va hudud uchun amaldagi rejim bekor qilindi. Qirollik hukumati 60 ta mamlakat fuqarolariga 30 kunlik vizasiz kirish huquqini qoldirgan bo‘lsa-da, O‘zbekiston ushbu ro‘yxatdan joy olmadi. Shuningdek, chegara punktida beriladigan “Visa on Arrival” imkoniyati ham o‘zbekistonliklar uchun amalda bo‘lmaydi.
Endilikda O‘zbekiston fuqarolari Tailandga safar qilishni rejalashtirsa, jo‘nab ketishdan oldin sayohat maqsadiga mos keladigan vizani rasmiylashtirishlari lozim. Buning uchun Tailand hududidan tashqarida turgan holda masofaviy e-Visa (elektron viza) tizimi orqali onlayn ariza topshirish imkoniyati saqlanib qolgan.
Cheklovlar kuchga kiradigan 15-sentyabr sanasigacha Tailandga amaldagi vizasiz rejim bilan kirib ulgurgan xorijliklar uchun ilgari berilgan 60 kunlik muddat avtomatik ravishda qisqartirilmaydi. Rasmiy Bangkok vizasiz rejimlar ro‘yxatini qisqartirish qarorini milliy xavfsizlik, iqtisodiy manfaatlar hamda xalqaro munosabatlardagi o‘zaro tenglik tamoyillari bilan izohlamoqda.
Avvalroq Tailand hukumati mamlakatga vizasiz kirish va “Visa on Arrival” tizimiga o‘zgartirish kiritish bo‘yicha taklifni ma’qullagani xabar qilingan edi.
