Suriyada Asad rejimining maxfiy obyektidan 73 tonna uran va yadro reaktori infratuzilmasi topildi
MAGATE mutaxassislari tomonidan avgust oyida o‘tkazilgan dala kuzatuvlari natijasida al-Kibor va unga tutash hududlarda yadroviy reaktorlarga xos bo‘lgan sovutish tizimlari qayd etilgan. Topilgan 73 tonna tabiiy uranning 55 tonnasi maxsus issiqlik ajratuvchi yig‘malarga joylashtirilgani, qolgan 18 tonnasi esa uran parchalari hamda chiqindilaridan iborat ekani ma’lum bo‘ldi. Sobiq rejim yillar davomida ushbu obyektlar va radioaktiv materiallar haqida xalqaro hamjamiyatga axborot berishdan bosh tortib kelgan.
Ayni paytda Damashqning yangi ma’muriyati xalqaro tashkilot bilan to‘liq shaffoflik tamoyili asosida hamkorlik qilmoqda. Suriya Atom energiyasi komissiyasi raisi Mudar al-Okla agentlik inspektorlariga barcha shubhali obyektlar va hududlarga kirish uchun to‘liq sharoit yaratib berilganini hamda zarur hujjatlar taqdim etilganini bildirdi. Tekshiruvlar davomida aniqlangan barcha yadroviy materiallar MAGATE kafolati va nazorati ostiga olingan.
Yangi hukumat vakillarining ta’kidlashicha, o‘tmishdagi yashirin yadroviy faoliyatga oid noaniqliklarga barham berish va xalqaro kafolatlarni ta’minlash mamlakatga bo‘lgan ishonchni tiklaydi. Suriyaning kelgusidagi maqsadi atom energiyasidan harbiy va maxfiy maqsadlarda emas, balki tibbiyot, energetika hamda qishloq xo‘jaligi kabi tinchliksevar sohalarda foydalanishdan iborat bo‘ladi.
