Soxta forma va firibgarlikka chek qo‘yiladi. Noqonuniy harbiy kiyim uchun ma’muriy javobgarlik belgilanishi kutilmoqda
Tashabbus ayrim shaxslar yoki tashkilotlar tomonidan rasmiy tasdiqlangan formaga o‘xshash kiyimlardan noqonuniy foydalanish holatlarining oldini olishga qaratilgan. Qonun mualliflarining ta’kidlashicha, bunday kiyimlar fuqarolarni chalg‘itib, o‘zini davlat xodimi sifatida ko‘rsatish va firibgarlik qilish uchun sharoit yaratmoqda.
Yangi hujjat bilan rasmiy idoraviy kiyimlarga o‘xshash, farqlovchi belgilarga ega kiyimlarni ishlab chiqarish, kiyib yurish va muomalaga kiritish taqiqlanib, ma’muriy jazo joriy etiladi. Bu normalar davlat xizmati nufuzini saqlash va fuqarolar xavfsizligini ta’minlashga xizmat qiladi.
Deputatlar muhokama davomida bildirilgan takliflarni inobatga olgan holda qonun loyihasini ikkinchi o‘qishga tayyorlashmoqda.
