So‘xda muntazam aviaqatnovlar yo‘lga qo‘yiladi va yangi GES quriladi
Farg‘ona viloyatining So‘x tumanini 2026–2028-yillarda ijtimoiy-iqtisodiy rivojlantirish dasturi doirasida 1,5 trillion so‘mlik mablag‘ evaziga 162 ta investitsiya va ijtimoiy loyiha amalga oshiriladi. Rejaga ko‘ra, tumanga 80 million dollarlik investitsiya jalb etilib, eksport hajmi 15 million dollarga yetkaziladi, sayyohlar oqimi esa 1,4 barobarga oshiriladi.
So‘x daryosi sohili bo‘yidagi 176 gektar maydonda 720 milliard so‘mlik investitsiya hisobiga zamonaviy kurort-sog‘lomlashtirish majmuasi barpo etiladi. Anklav hudud uchun eng muhim yangiliklardan biri – muntazam aviaqatnovlarning yo‘lga qo‘yilishidir. Buning uchun So‘xdagi uchish-qo‘nish maydonini kengaytirish maqsadida qo‘shimcha 13 gektar yer ajratiladi hamda parvozlar Cessna-208 Caravan va L-410 rusumli havo kemalarida tashkil etiladi.
Infratuzilmani yaxshilash maqsadida tumandan boshqa shahar va tumanlarga jamoat transporti qatnovi yo‘lga qo‘yiladi, chegara o‘tkazish punktlarida ro‘yxatga olish darchalari soni ikki barobar ko‘paytiriladi. Bundan tashqari, tumanda quvvati 15 MVt bo‘lgan yangi GES qurilmoqda, bu esa 20 mingdan ortiq xonadonni barqaror elektr energiyasi bilan ta’minlash imkonini beradi.
