So‘nggi 10 yilda O‘zbekiston iqtisodiyotiga $160 mlrd investitsiya jalb qilindi
Prezident Shavkat Mirziyoyev Ko‘ksaroy qarorgohida o‘tkazilayotgan tadbirda so‘nggi o‘n yilda mamlakatda amalga oshirilgan ishlar va erishilgan natijalar haqida ma’lumot berdi.
Prezident ta’kidlaydiki, xalq bilan hamjihatlikda amalga oshirilayotgan ishlar natijasida O‘zbekiston iqtisodiyoti tez sur’atlarda va barqaror o‘sib bormoqda. O‘tgan davrda mamlakatga 160 milliard dollardan ortiq xorijiy investitsiya kiritilgan. Shu vaqt ichida iqtisodiyot 2,5 barobardan ziyod o‘sgan. Joriy yil yakunida yalpi ichki mahsulot hajmi 180 milliard dollardan oshishi kutilmoqda.
Sanoat, servis va qishloq xo‘jaligi sohalarida 5 million 700 mingta doimiy ish o‘rni yaratilgan. Davlat va xususiy sektor ishtirokida 1 million 500 ming o‘rinli zamonaviy maktablar, 342 ming o‘rinli bog‘chalar va 62 ming o‘rinli shifoxonalar ishga tushirilgan.
Aholining transport imkoniyatlarini yaxshilash maqsadida 83 ming kilometr umumiy foydalanishdagi ichki yo‘llar qurilgan va ta’mirlangan. Shuningdek, 8 million aholi yashaydigan xonadonlarga ilk bor markazlashgan ichimlik suvi yetkazilgan, yana 11,5 million aholining suv ta’minoti yaxshilangan.
O‘tgan o‘n yilda 650 ming oila yangi zamonaviy uy-joyga ega bo‘lgan. Prezident bu natijani xalq orasidagi “Uyli bo‘lish – vatanli bo‘lish” degan naql bilan izohlab, shu ma’noda kamida 2,5 million aholi yangi uy-joy bilan ta’minlanganini ta’kidladi.
