“Shimol qiroli” Endi Byornem Buyuk Britaniyaning yangi bosh vaziri bo‘ladi
Manchesterning sobiq meri Endi Byornem Buyuk Britaniyadagi hukmron Leyboristlar partyasining yangi rahbari etib saylandi. Uning saylangani 17-iyul kuni Londonda o‘tkazilgan maxsus partiya konferensiyasida e’lon qilindi. Konferensiyada 379 nafar leyborist deputat va partiyaga aloqador 23 ta tashkilot Byornem nomzodini qo‘llab-quvvatladi. Boshqa da’vogarlar bo‘lmagani bois u muqobilsiz asosda partiya yetakchisi etib tasdiqlandi.
Kir Starmer joriy yilning 22-iyun kuni bosh vazir va partiya rahbarligidan ketishini e’lon qilgan edi. Uning iste’fosi leyboristlarning 2026-yil may oyidagi mahalliy saylovlarda yomon natija ko‘rsatishi ortidan talab qilindi. Starmer qirol Karl III ga iste’fosini rasman topshirgach, monarx Endi Byornemga yangi hukumatni shakllantirishni taklif qiladi. Leyboristlar partiyasi parlamentda ko‘pchilikni tashkil etgani sababli, Byornem 20-iyul, dushanba kuni rasman bosh vazirlikni egallaydi.
Ma’lumot uchun, 1970-yilda tug‘ilgan Endi Byornem Leyboristlar partiyasining tajribali siyosatchilaridan biri sanaladi. U muqaddam Sog‘liqni saqlash hamda Madaniyat, OAV va sport vaziri lavozimlarida ishlagan. 2017-yildan buyon Buyuk Manchester meri bo‘lib kelgan Byornem pandemiya davrida markaziy hukumatga qarshi qat’iy pozitsiyasi uchun matbuotda “Shimol qiroli” nomini olgan edi. U 2010 va 2015-yillarda ham partiya yetakchiligi uchun kurashib, g‘alaba qozona olmagan va faqat 2026-yilga kelibgina parlamentga qaytgan.
Byornem o‘zining dastlabki nutqida partiyadagi ichki ziddiyatlarga barham berish, hokimiyat vakolatlarini hududlarga ko‘proq taqsimlash va siyosatni aholining kundalik muammolariga yo‘naltirishga va’da berdi. Shuningdek, u 2024-yilgi parlament saylovlarida leyboristlarning 14 yillik tanaffusdan keyin g‘alaba qozonishini ta’minlagan Kir Starmerga minnatdorlik bildirdi.
