Shavkat Mirziyoyev sobiq Qozog‘iston prezidenti Nazarboyevni tavallud kuni bilan qutladi
Oʻzbekiston Respublikasi Prezidenti Shavkat Mirziyoyev 6-iyul kuni telefon orqali muloqotda Qozogʻiston Respublikasining birinchi Prezidenti Nursulton Nazarboyevni tavallud kuni bilan samimiy tabriklab, unga mustahkam sogʻliq, baxt-saodat va uzoq umr tiladi.
Davlatimiz rahbari Nursulton Nazarboyevning zamonaviy Qozogʻistonning barpo etilishi, Markaziy Osiyoda mintaqaviy hamkorlikni ilgari surish hamda Oʻzbekiston – Qozogʻiston strategik sheriklik va ittifoqchilik munosabatlarini mustahkamlashga qoʻshgan ulkan hissasini alohida eʼtirof etdi.
Oʻzbekiston bilan Qozogʻiston oʻrtasidagi mustahkam doʻstlik, yaxshi qoʻshnichilik va oʻzaro koʻmak rishtalariga asoslangan koʻp qirrali hamkorlikning bugun yuqori surʼatda rivojlanib borayotgani mamnuniyat bilan qayd etildi.
Nursulton Nazarboyev 1940-yil 6-iyulda Qozog‘istonning Chemolgan qishlog‘ida tug‘ilgan. U mehnat faoliyatini metallurg sifatida boshlagan, keyinchalik Sovet Ittifoqi davrida partiya tizimida rahbarlik lavozimlarida ishlagan. 1990-yil 24-aprelda Qozog‘iston SSR prezidenti etib saylandi, 1991-yil mamlakat mustaqillikka erishgach esa mustaqil Qozog‘istonning birinchi prezidenti bo‘ldi.
Nazarboyev mamlakatni qariyb 29 yil, mustaqil Qozog‘istonni esa 27 yildan ortiq boshqardi. Uning prezidentligi davrida poytaxt Olmaotadan Astanaga ko‘chirildi, iqtisodiy islohotlar amalga oshirildi va Qozog‘iston Markaziy Osiyodagi yirik iqtisodiyotlardan biriga aylandi. U 2019-yilda prezidentlik lavozimini tark etib, vakolatlarini Qosim-Jomart Toqayevga topshirdi.
