Shavkat Mirziyoyev elektropoyezdda Toshkentdan Bekobodga bordi
Prezident matbuot xizmati ma’lum qildiki, 192 kilometr uzunlikdagi "Toshkent – Bekobod" yo‘nalishi kuniga qariyb 1 ming, yiliga esa 300 ming yo‘lovchiga xizmat ko‘rsatishi rejalashtirilgan.
Yangi qatnovda 6 vagondan iborat, 586 yo‘lovchiga mo‘ljallangan elektropoyezd harakatlanadi. Poyezdning maksimal tezligi soatiga 120 kilometrni tashkil etadi.
Elektropoyezd nogironligi bo‘lgan shaxslar uchun maxsus ko‘targichlar, konditsioner va isitish tizimlari, yumshoq o‘rindiqlar, USB quvvatlash nuqtalari, Wi-Fi, videokuzatuv, elektron axborot tablolari hamda velosipedlar uchun maxsus joylar bilan jihozlangan.
Prezident temir yo‘l infratuzilmasini yanada rivojlantirish, yo‘lovchilar uchun qulayliklarni oshirish, temir yo‘llarni elektrlashtirish va ularga tutash hududlarni obodonlashtirish bo‘yicha mutasaddilarga topshiriqlar berdi. Shuningdek, vokzal infratuzilmasi, xizmat ko‘rsatish sifati va yo‘lovchilar oqimini samarali tashkil etish masalalariga alohida e’tibor qaratildi.
