Shahnoza Mirziyoyeva: “Namanganda jabrlangan qizaloq va uning oilasi boshqa shaharda yangi hayot boshlaydi”
Namanganda zo‘ravonlikdan jabrlangan besh yoshli qizaloq va uning oilasi boshqa shaharga ko‘chirilib, uy-joy bilan ta’minlanadi. Bu haqda Ijtimoiy himoya milliy agentligi direktorining birinchi o‘rinbosari Shahnoza Mirziyoyeva ma’lum qildi.
Uning bildirishicha, oilaga to‘liq ijtimoiy yordam ko‘rsatiladi, zarur reabilitatsiya tashkil etiladi. Qizaloqning onasiga o‘qish va ishga joylashishda, zarurat tug‘ilsa, familiyasini o‘zgartirishda ham ko‘maklashiladi.
“Eng muhimi, bolajon va uning yaqinlari xavfsiz joyda yangi hayot boshlashlari uchun barcha zarur sharoitlar yaratiladi”, — dedi Shahnoza Mirziyoyeva.
Qayd etilishicha, hodisaning ilk kunlaridan agentlik mutaxassislari va psixologlar qizaloq hamda uning onasi bilan ishlamoqda. Oilaga zarur yordam ko‘rsatilmoqda.
Shahnoza Mirziyoyevaning ta’kidlashicha, Prezident Administratsiyasi masalani alohida nazoratga olgan, barcha mas’ul idoralar dastlabki kunlardanoq ishga jalb qilingan.
“Mazkur jinoyat aslo jazosiz qolmaydi!” — deya ta’kidladi u.
Saida Mirziyoyeva ham voqeaga munosabat bildirib, jinoyatni sodir etgan shaxsga eng og‘ir jazi berilishini ta’kidladi.
“Nazarimda, bunday vahshiyona jinoyatlar uchun aslida o‘lim jazosini qo‘llash kerak. Lekin, ming afsuski, amaldagi qonunchilikda oliy jazo ko‘zda tutilmagan”, — deb yozdi u.
Uning bildirishicha, tegishli idoralarga barcha zarur ko‘rsatmalar berilgan. Jinoyatchi qonun doirasidagi eng og‘ir jazoga tortilishi, shuningdek, beparvoligi bilan jinoyatga yo‘l ochgan va bolani himoya qila olmagan barcha mas’ullar ham jazolanishi ta’kidlangan.
Saida Mirziyoyeva bunday jinoyatlar uchun javobgarlikni maksimal darajada kuchaytirish maqsadida qonun hujjatlariga o‘zgartirish kiritish bo‘yicha taklif tayyorlanayotganini ham ma’lum qildi.
Namanganda 5 yoshli qizaloqning zo‘rlanishi
Namangan viloyatining Uchqo‘rg‘on tumanidagi bog‘chalardan birida sentyabr oyida 5 yoshli bolaga nisbatan jinsiy zo‘ravonlik sodir etilgani yuzasidan jinoyat ishi qo‘zg‘atilgan.
Mazkur holatdan so‘ng Maktabgacha va maktab ta’limi vazirligi barcha davlat maktabgacha ta’lim tashkilotlari xodimlari tekshirilayotganini ma‘lum qildi.
Uchqo‘rg‘on tumani IIB Tergov bo‘limi tomonidan mazkur holat bo‘yicha Jinoyat kodeksining 118-moddasi (nomusga tegish) hamda 112-moddasi (o‘ldirish yoki zo‘rlik ishlatish bilan qo‘rqitish) alomatlari bilan jinoyat ishi qo‘zg‘atilgan.
Ayni paytda ishning o‘ta jiddiyligi e’tiborga olinib, u viloyat prokuraturasi ish yurituviga o‘tkazilgan va har tomonlama xolis tergov harakatlari davom ettirilmoqda. Tergov jarayonining barcha bosqichlari hamda jabrlanuvchi voyaga yetmagan bolaning huquqlarini himoya qilish bevosita Bosh prokuror Nig‘matilla Yo‘ldoshev tomonidan shaxsiy nazoratga olingan.
