Namangandagi bog‘chada sodir bo‘lgan zo‘ravonlik ishi bo‘yicha tergovni Bosh prokuror shaxsan o‘z nazoratiga oldi
Rasmiy ma’lumotlarga ko‘ra, joriy yilning sentyabr oyida Uchqo‘rg‘on tumani IIB Tergov bo‘limi tomonidan mazkur holat bo‘yicha Jinoyat kodeksining 118-moddasi (nomusga tegish) hamda 112-moddasi (o‘ldirish yoki zo‘rlik ishlatish bilan qo‘rqitish) alomatlari bilan jinoyat ishi qo‘zg‘atilgan. Olib borilgan tezkor tergov harakatlari davomida gumonlanuvchi bir nafar shaxs aniqlanib, unga nisbatan qamoqqa olish tarzidagi ehtiyot chorasi qo‘llanilgan.
Ayni paytda ishning o‘ta jiddiyligi e’tiborga olinib, u viloyat prokuraturasi ish yurituviga o‘tkazilgan va har tomonlama xolis tergov harakatlari davom ettirilmoqda. Tergov jarayonining barcha bosqichlari hamda jabrlanuvchi voyaga yetmagan bolaning huquqlarini himoya qilish bevosita Bosh prokuror Nig‘matilla Yo‘ldoshev tomonidan shaxsiy nazoratga olingan.
Shuningdek, nazorat organi ushbu hodisaga aloqador bo‘lgan, jinoyat holatlarini yashirishga uringan yoki o‘z vazifasiga mas’uliyatsizlik bilan qaragan har qanday shaxs hamda mansabdorlarning harakatlariga qat’iy huquqiy baho berilishini ma’lum qildi. Tergov natijalari bo‘yicha qonuniy tartibda qo‘shimcha axborot berilishi ko‘zda tutilgan.
